Onte foi inagurada oficialmente a Semana Internacional de Cine de Autor, cunha gala celebrada no auditorio Gustavo Freire, e que correu a cargo do grupo de teatro Achádego.
Nela foron presentadas as pezas que comporán a seccións do ciclo, e o director Brais Revaldería presentou o documental Arde Lucus, que foi proxectada a continuación. Tamén foi proxectada o obra experimental de Ronnie Cramer, Pillow Girl.
Oito son as pezas que compoñen a programación para o día de hoxe, dentro dos diferentes ciclos e espazos que inclúe esta semana de cine na cidade.
Entre outros, destaca a longametraxe Una familia de Tokio, Espiga de Oro na Seminci de Valladolid, e que será proxectada as oito da tarde no auditorio Gustavo Freire.
A sección oficial, tamén no Gustavo Freire pero as once da noite, proxectará o filme ‘El Rayo’ dirixida por Fran Araujo, e Ernesto Nova.
Na biblioteca provincial poderase visionar Soul Kitchen, premio especial do Xurado no Festival de Venecia no ano 2009.
Tamén comezará o ciclo de Homenaxes, ca proxección de El Baile de las Ánimas, e a presentación do libro adicado ó seu director, Manuel Lorenzo.
Caravaggio, dentro do ciclo ‘Arte de Cine’, será a peza proxectada no Museo Provincial as seis da tarde, gañadora do Oso de Plata no Festival de Cine de Berlín no ano 86.
Os ciclos ‘Colleita Dourada’ e ‘As curtas tamén son cine’, pechan o programa para hoxe, no Museo Interactivo de Historia de Lugo e no Vicerreitorado da Universidade, respectivamente.